|
( 1 )
ਛੰਦ ਪਰਾਗੇ ਜਲਦੀ ਜਲਦੀ ਕਰ ਲਓ ਕੋਈ ਉਪਾਅ
ਦਿਲ ਦੇ ਕਾਲ਼ੇ ਲੋਕਾਂ ਕਰਨਾ ਭਾਰਤ ਦੇਸ਼ ਤਬਾਹ ।
ਛੰਦ ਪਰਾਗੇ ਕਸਮਾਂ ਖਾ ਲਓ ਫਿਰਕੇ ਵੱਡੇ, ਛੋਟੇ
ਏਕਾ ਕਰ ਕੇ ਭਾਰਤ ਮਾਂ ਦੇ ਹੋਣ ਨਹੀਂ ਦੇਣੇ ਟੋਟੇ ।
ਛੰਦ ਪਰਾਗੇ ਖ਼ੌਫ਼ਜ਼ਦਾ ਹੋ ਘੁੱਟ ਜ਼ਹਿਰ ਦਾ ਪੀਣਾ
ਦੁੱਭਰ ਕੀਤਾ ਘੱਟ ਗਿਣਤੀ ਲਈ ਭਾਰਤ ਦੇ ਵਿਚ ਜੀਣਾ ।
ਛੰਦ ਪਰਾਗੇ ”ਰਾਮ ਮੰਦਰ” ਲਈ ਸਾਰਾ ਮਾਲ ਤਿਆਰ
ਇਸ ਸਾਜਸ਼ ਵਿਚ ਅੰਦਰਖਾਤੇ ਸ਼ਾਮਲ ਹੈ ਸਰਕਾਰ ।
ਛੰਦ ਪਰਾਗੇ ਭਗਵੇਂ ਰੰਗ ਵਿਚ ਰੰਗਿਆ ਜਦੋਂ ਕਨੂੰਨ
ਭਾਰਤਵਰਸ਼ ਨੂੰ ਲੈ ਡੁੱਬੇ ਗਾ ਏਹੋ ਜਿਹਾ ਜਨੂੰਨ ।
ਛੰਦ ਪਰਾਗੇ ਦਾਗ਼ੀ ਕੀਤਾ ”ਬਾਪੂ” ਦਾ ਕਿਰਦਾਰ
ਜਦ ਗੁਜਰਾਤ ਦੇ ਅੰਦਰ ਕੋਹ ਕੋਹ ਮੁਸਲਮ ਦਿੱਤੇ ਮਾਰ ।
ਛੰਦ ਪਰਾਗੇ ਡਿੱਠਾ ਸ਼ਾਇਰ ਨੇ ਘੁੰਮ ਕੇ ਦੇਸੋਂ ਬਾਹਰ
ਸੱਭ ਤੋਂ ਵੱਧ ਕਮੀਨਾ ਭਾਰਤ ਦਾ ਸਰਮਾਏਦਾਰ ।
ਛੰਦ ਪਰਾਗੇ ਦਿਲ ਦੀ ਖੋਟੀ ਦਿੱਲੀ ਮਾਰੇ ਦਾਅ
ਚਿਤਵਿਆ ਹੋਇਆ ਇਸ ਨੇ ਦੇਣਾ ਕਰ ਪੰਜਾਬ ਤਬਾਹ ।
ਛੰਦ ਪਰਾਗੇ ਘੜੇ ਸਕੀਮਾਂ ਦਿੱਲੀ ਇਜ਼ਤਾਂ ਰੋਲ਼ੇ
ਕਿ ਪੰਜਾਬ ਨਾ ਸਦੀਆਂ ਤੀਕਰ ਇਸ ਦੇ ਮੂਹਰੇ ਬੋਲੇ ।
ਛੰਦ ਪਰਾਗੇ ਦੋਖੀ ਕੋਈ ਦਏ ਨਾ ਵਿਤਕਰੇ ਪਾ
ਵਸਦੇ ਕੁੱਲ ਪੰਜਾਬ ਚ ਫਿਰਕੇ ਪ੍ਰਸਪਰ ਭੈਣ ਭਰਾ ।
ਛੰਦ ਪਰਾਗੇ ਹੈ ਇਹ ”ਮੱਥੇਰੰਗਿਆਂ” ਨੂੰ ਸ਼ਹਿ ਦੇਣਾ
ਸਿਰਫ ਅਸਿਹਣਸ਼ੀਲਤਾ, ਕਤਲੋਗ਼ਾਰਤ ਨੂੰ ਕਹਿ ਦੇਣਾ ।
ਛੰਦ ਪਰਾਗੇ ਆਈਏ ਜਾਈਏ ਛੰਦ ਪਰਾਗੇ ਜੁੱਤੀ
ਜੰਤਾ ਸੁੱਤੀ, ਓਧਰ ਚੋਰਾਂ ਦੇ ਨਾਲ ਰਲ਼ ਗਈ ਕੁੱਤੀ ।
ਛੰਦ ਪਰਾਗੇ ਅਮਲਾਂ ਦੇ ਵਿਚ ਕੋਈ ਕੰਮ ਨਾ ਕਾਰ
ਨੇਤਾ ਜੀ ਦਾ ਰਾਤ ਦਿਨ ਬੱਸ ਕਸਮਾਂ ਨਾਲ ਵਿਹਾਰ ।
ਛੰਦ ਪਰਾਗੇ ”ਸੁਰਤੀ” ਪੀ ਕੇ ਬੁੱਧੀ-ਵਰਗ ਹੈ ਸੁੱਤਾ
ਅੱਜ ਭਾਰਤ ਵਿਚ ਤਖਤ ਤੇ ਬਹਿ ਕੇ ਚੱਕੀ ਚੱਟੇ ਕੁੱਤਾ ।
ਛੰਦ ਪਰਾਗੇ ਕਿਉਂ ਨਾ ਦੇਈਏ ਇਸ ਉੱਨਤੀ ਦੀ ਦਾਦ !
ਥਾਣੇ ਬਣੇ ਤਸੀਹੇ-ਕੇਂਦਰ ਅਫ਼ਸਰ ਬਣੇ ਜੱਲਾਦ ।
ਛੰਦ ਪਰਾਗੇ ਕੁੱਟੇ, ਮਾਰੇ ਕੱਢੇ ਗਾਲ਼ ਹਜ਼ਾਰ
ਰਾਜ ਫਰੰਗੀ ਵਾਲਾ ਅੱਜ ਵੀ ਕਰਦੀ ਪੁਲਸ ਵਿਹਾਰ ।
..........................................................................................
( 2 )
ਛੰਦ ਪਰਾਗੇ ਭਾਰਤ ਦੇ ਵਿਚ ਰਲ਼ ਕੇ ਧਨ ਕਮਾਉਂਦੇ
ਪਿੰਡ ਦੇ ਪਟਵਾਰੀ ਤੋਂ ਲੈ ਕੇ ਡੀ. ਸੀ ਤਕ ਸੱਭ ”ਖਾਂਦੇ” ।
ਛੰਦ ਪਰਾਗੇ ”ਨੰਬਰ ਤਿੰਨ” ਦਾ ਵਧਦਾ ਜਾਵੇ ਧੰਦਾ
ਦਫ਼ਤਰ ਵਿਚੋਂ ਫ਼ਾਈਲਾਂ ਗ਼ਾਇਬ ਥਾਣੇ ਵਿਚੋਂ ਬੰਦਾ ।
ਛੰਦ ਪਰਾਗੇ ਆਈਏ ਜਾਈਏ ਛੰਦ ਪਰਾਗੇ ਰੋੜੇ
ਅੱਜ ਕਿਸਾਨਾਂ ਦੀ ਰੱਤ ਮੰਡੀ ਨਿੰਬੂ ਵਾਂਗ ਨਚੋੜੇ ।
ਛੰਦ ਪਰਾਗੇ ਪਏ ਕਿਸਾਨ ਅੱਜ ਖੁਦਕੁਸ਼ੀਆਂ ਦੇ ਰਾਹ
ਬੱਤੀ ਵਾਲੀਆਂ ਕਾਰਾਂ ਨੂੰ ਪਰ ਉੱਕਾ ਨਹੀਂ ਪਰਵਾਹ ।
ਛੰਦ ਪਰਾਗੇ ਠੱਗੀ ਜਾਂਦੇ ਧਰਮ ਦੇ ਠੇਕੇਦਾਰ
ਸੰਤਾਂ ਵਾਲੇ ਚੋਲੇ ਪਾ ਕੇ ਬੰਨ ਨੀਲੀ ਦਸਤਾਰ ।
ਛੰਦ ਪਰਾਗੇ ਆਈਏ ਜਾਈਏ ਛੰਦ ਪਰਾਗੇ ਕੇਲੇ
”ਜਥੇਦਾਰਾਂ” ਦੀ ਯਾਦ ਚ ਲੱਗਦੇ ਲੁੱਚ ਗੀਤਾਂ ਦੇ ਮੇਲੇ ।
ਛੰਦ ਪਰਾਗੇ ਕਰਨਾ ਸੀ ਜਿਸ ਜੱਗ ਤੇ ਸੁਰਖ ਸਵੇਰਾ
”ਨਵਾਂ ਜ਼ਮਾਨਾ” ਬਣ ਗਿਆ ਅੱਜ ਕੱਲ੍ਹ ਮਧਵਰਗਾਂ ਦਾ ਡੇਰਾ ।
ਛੰਦ ਪਰਾਗੇ ਵਿਸ਼ਵੀਕਰਣ ਦੀ ਐਸੀ ਖਿੜੀ ਬਹਾਰ
ਲਹੂ ਦੇ ਰਿਸ਼ਤੇ ਦੁਨੀਆਂ ਦੇ ਵਿਚ ਬਣ ਗਏ ਕਾਰੋਬਾਰ ।
ਛੰਦ ਪਰਾਗੇ ਦੁਨੀਆਂ ਦੇ ਵਿਚ ਐਸੇ ਬਣ ਰਹੇ ਜੁੱਟ
ਬਹੁ-ਰਾਸ਼ਟਰੀ ਨਿਗਮਾਂ ਲੈਣਾ ਭਾਰਤਵਰਸ਼ ਨੂੰ ਲੁੱਟ ।
ਛੰਦ ਪਰਾਗੇ ਆਈਏ ਜਾਈਏ ਛੰਦ ਪਰਾਗੇ ਟਾਲੀ
ਵਿਰਲੀ ਵਿਰਲੀ ਰੂਹ ਕੋਈ ਜਾਗੇ ਅੱਜ ਵੀ ਕਰਮਾਂ ਵਾਲੀ ।
ਛੰਦ ਪਰਾਗੇ ਆਈਏ ਜਾਈਏ ਛੰਦ ਪਰਾਗੇ ਆਰਾ
ਕਾਲ਼ੀ ਰਾਤ ਚ ਅੱਜ ਵੀ ਚਮਕੇ ਟਾਵਾਂ ਟਾਵਾਂ ਤਾਰਾ ।
( ਛਪ ਰਹੀ ਪੁਸਤਕ ”ਕਲਾ ਦੀ ਘਾਟ” ਵਿਚੋਂ )
-0- |
