ਦੋ ਕਵਿਤਾਵਾਂ
- ਦਿਲਜੋਧ ਸਿੰਘ

1) ਤੇਰੇ ਰਾਹ ਤੈਨੂੰ ਮੁਬਾਰਕ

------------------------


ਦਿੰਨ ਚੜਦੇ ਤੂੰ ਘਰ ਨਾਂ ਆਇਆ
ਸਿਖਰ ਦੁਪਹਿਰੇ ਵਾਤ ਨਾਂ ਪੁੱਛੀ
ਸੁਖ ਸੁਨੇਹਾ ਰਹੀ ਉਡੀਕਦੀ
ਸ਼ਾਮ ਢੱਲੇ ਕੁੰਡੀ ਖੜਕਾਂਵੇਂ
ਦਸ ਬੂਹਾ ਖੋੱਲਾਂ, ਨਾਂ ਖੋੱਲਾਂ ।

ਬੂਹੇ -ਵਿਰਲੀਂ ਤੈਨੂੰ ਤੱਕਿਆ
ਸੁੰਨ ਹੋ ਗਈ ਮੈਂ ਆਪਾ ਭੁੱਲੀ
ਕੀ ਕਰਦੀ ਮੇਰੀ ਜਾਤ ਨਿਮਾਣੀ
ਹੱਥ ਕੰਬੇ ਪਰ ਕੁੰਡੀ ਖੋਲੀ
ਗੂੰਗੀ ਹੋ ਗਈ ਕੀ ਮੈਂ ਬੋੱਲਾਂ ।

ਅੰਦਰ ਲੰਘਿਆ, ਪਲੰਘੀਂ ਬੈਠਾ
ਖੜੀ ਸਾਹਮਣੇ ਦੇਖੀਂ ਜਾਵਾਂ
ਸਚ , ਝੂਠ ਨਾਲ ਘੁਲਦੀ ਜਾਵਾਂ
ਮਰ ਚੁਕੇ ਖਾਬਾਂ ਦੀ ਗਾਥਾ
ਪੱਥਰ ਅੱਗੇ ਕਾਹਨੂੰ ਰੋੱਲਾਂ ।

ਲੰਘਿਆ ਵਕਤ ਮੁੜ ਨਹੀਂ ਆਉਣਾ
ਬੇਕਦਰਾਂ ਨੂੰ ਕੀ ਸਮਝਾਉਣਾ
ਜ਼ਿੰਦਗੀ ਨੇੜੇ ਤੂੰ ਨਹੀਂ ਬੈਠਾ
ਛਡ ਪਰਾਂ ਹੁਣ ਸ਼ਾਮ ਦੇ ਵੇਲੇ
ਹੋਰ ਝੂਠ ਨਾਂ ਸਾਹੀਂ ਘੋੱਲਾਂ ।


ਜ਼ਿੰਦਗੀ ਬਣ ਗਈ ਸੌਦੇ ਬਾਜ਼ੀ
ਮੈਂ ਹਾਰੀ , ਤੂੰ ਵੱਸੇਂ ਰਾਜ਼ੀ
ਮੰਨ ਮੰਨੇ ਦੇ ਮੇਲ ਨੇ ਸਜਨਾਂ
ਤੇਰੇ ਰਾਹ ਤੈਨੂੰ ਮੁਬਾਰਕ
ਰਾਹ ਬਿਗਾਨੇ ਮੈਂ ਨਾਂ ਟੋੱਲਾਂ ।


2) ਤੂੰ ਅਤੇ ਮੈਂ
--------------
ਮੈਂ ਗਗਨਾਂ 'ਚੋੰ ਤੈਨੂੰ ਲਭਦਾ ਰਿਹਾ ,
ਤੂੰ ਮੇਰੇ ਗਵਾਂਢੇ ਹੀ ਵਸਦਾ ਰਿਹਾ ।
ਮੈਂ ਰਾਤਾਂ ਨੂੰ ਤਾਰੇ ਗਿਣਦਾ ਰਿਹਾ ,
ਤੂੰ ਤੱਕ ਤੱਕ ਕੇ ਮੈਨੂੰ ਹਸਦਾ ਰਿਹਾ ।

ਮੈਂ ਕੂੜਾਂ ਦਾ ਕੂੜਾ ਕਿਉਂ ਫੋਲਿਆ
ਧਰਤੀ 'ਤੇ ਆਸਮਾਂ ਮਿਲਾਉਂਦਾ ਰਿਹਾ ,
ਨਜ਼ਰ ਮੇਰੀ ਭਟਕੀ ,ਗਵਾਚੀ ਸਚਾਈ
ਤੂੰ ਮੇਰੇ ਦੁਵਾਲੇ ਹੀ ਨਸਦਾ ਰਿਹਾ ।

ਜੰਗਲ 'ਤੇ ਬੇਲੇ ਕਿਉਂ ਮੈਂ ਸੀ ਗਾਹੇ
ਰਾਹਾਂ ਦੀ ਮਿੱਟੀ ਕਿਉਂ ਸਿਰ 'ਤੇ ਪਾਈ ,
ਹਰ ਚੌਰਾਹੇ 'ਚ ਖੜੀ ਰੂਹ ਤੇਰੀ
ਕਿਧਰ ਮੈਂ ਸੀ ਜਾਣਾ , ਦਸਦਾ ਰਿਹਾ ।

ਰਾਤੀਂ ਹਨੇਰਾ ਵੀ ਜਿੰਦਗੀ ਦਾ ਹਿੱਸਾ
ਕਦੀ ਕਦੀ ਸੂਰਜ ਚੜਦਾ ਏ ਲਿੱਸਾ ,
ਤੂੰ ਬਹਿ ਕੋਲ ਮੇਰੇ,ਬਣ ਕੇ ਦਿਲਾਸਾ
ਮਾਯੂਸੀ 'ਤੇ ਚਾਨਣ ਨੂੰ ਝਸਦਾ ਰਿਹਾ ।

ਦਿਲ ਮੇਰਾ ਕਹਿੰਦਾ ਕੁਝ ਹੈ ਗਵਾਚਾ
ਲਭ ਉਸਨੂੰ ਜਲਦੀ , ਦਿੰਨ ਬਹੁਤ ਛੋੱਟਾ ,
ਜ਼ਿੰਦਗੀ ਦੀ ਡੋਰੀ , ਤਕੇ ਕੇ ਤੂੰ ਢਿੱਲੀ
ਲੁੱਕ -ਚੁੱਪ ਆਇਆ 'ਤੇ ਕਸਦਾ ਰਿਹਾ ।

diljodh@yahoo.com
Menomonee falls WI-USA

-0-